Archive for the Script Category

我好有信心⋯⋯帶領香港

Posted in Election, Script on March 25, 2017 by loso

特首候選人林鄭月娥投票日前夕宣傳片

 

(按:此宣傳片文字平淡乏味,拍攝粗糙,明顯是看見競爭對手的短片,而匆匆回應之舉,乃投票日前夕候選人宣傳片的最佳反面教材。)

 

 

你好!兩個多月嘅選舉工程,終於嚟到尾聲啦。

 

今次嘅選舉,令我獲益良多。我盡咗好大嘅努力,用心聆聽各界嘅意見,亦都好畀心機,做好我嘅政綱。

 

我好有信心,同大家同行,帶領香港,實現我哋共同嘅願意,建設一個更加美好嘅香港。

今日⋯⋯聽日

Posted in Election, Script on March 25, 2017 by loso

 

特首候選人曾蔭華投票日前夕宣傳片

今日,係我作為特首候選人嘅最後一日;

聽日,或者會係香港重建信任、團結同希望嘅新一日。

 

對於我嚟講,希望就係,相信聽日可以比今日好。

 

今日,可能香港人重會以顏色區分你我,

聽日,我哋可以撇甩政治嘅標籤,齊心合力,創造一個更加好嘅香港。

 

今日,你可能會感到迷惘,唔知道重應唔應該留喺香港。

聽日,希望我哋可以再次相信香港,為香港感到自豪。

 

今日,我哋重未知道投票嘅結果,但係聽日,我相信對香港有承擔嘅人,都會以手上一票扭轉香港嘅命運,喺暗室為香港帶來光明。

 

今日,我仍然充滿希望,因為聽日,香港一定會更好。

不老民主夢

Posted in Election, Script on March 25, 2017 by loso

特首選舉候選人胡國興,投票日前夕短片

 

就係呢棵大榕樹,開始咗我嘅故事。

 

當年雖然我好細個,我就喺呢度,見到有人收陀地,燃點我心裏面要追尋公義嘅一團火。

 

我做法官唔可以參與政治,政治上遲起步。所以過去幾個月哩,我每日都非常落力見人,希望多睇多聽,寫出一個最合適香港嘅政綱,化解法會上嘅怨氣。

 

有人哩笑我陪跑喎,其實我一路領先緊,講到政綱,John 同 Carrie 一直都喺我後面食塵。

 

咁喺選舉嘅過程之中,少不色會聽到批評或者謾罵。我唔會猜度佢地背後嘅目的,我只係知道要用盡我嘅能力,加快香港嘅民主步伐、改善民生,將呢五年嚟搞到烏煙瘴氣嘅香港,重新縫合,團結起嚟。

 

香港人係好可愛嘅,面對逆境識得靈活應對,mean得嚟其實好有人情味嘅,有時激吓你啦,但其實好有你心㗎喎。所以到咗今日,我對呢個地方依然抱有希望嘅。

 

我係第一個宣佈參選行政長官嘅。由參選嗰一分鐘開始,就表明不理8.31,目標係要由市民選出邊個可以提名候選人,然後一人一票選出行政長官,最終達至雙普選。

 

我從來唔會含糊其詞㗎喎,又唔會立場飄忽。因為普選係莊嚴嘅事,絕對唔能夠含混過骨嘅。實情係,由我參選第一日起,我就一直去追尋呢個夢。希望大家畀香港一個機會,同我一齊發尼場不老嘅民主夢。

相信一個人,不如相信每一個人

Posted in Election, Script on February 27, 2017 by loso

特首選舉候選人曾俊華宣傳短片

 

 

我係曾俊華。

 

呢幾年,我哋遇上唔少問題。呢啲問題亦到令我哋互相遇上。

 

係無數嘅相遇裏面,因為諗法唔同,產生咗唔少衝突。

 

漸漸我哋只顧住衝突,忘記我哋嘅相遇,本來係為咗解決問題。

 

過咗呢幾年,我見到要解決香港嘅問題,唔可以只靠一個人,而係要靠一班人。

 

我哋係時候,由對立返番去建立。

 

我哋係時候,用大家嘅諗法,去建立番一個有規有矩嘅制度。

 

一個唔會睇新聞,睇到好嬲嘅朝頭早。

 

一個唔會因為唔同立場,而unfriend朋友嘅社會,一個似返香港嘅香港。

 

我係曾俊華。其實我係咪曾俊華,唔係最緊要,因為相信一個人,不如相信每一個人。香港嘅未來,要靠我哋團結,拍住上!

曾俊華競選眾籌呼籲

Posted in Election, Script on February 2, 2017 by loso

你重信唔信,五年後,你唔會後悔留喺香港?你重信唔信,五年後,香港會更好?

 

我信!因為,我相信你哋,我相信香港。

 

香港人有咁多好嘅諗法,只要團結,點會冇辦法?

 

未來五年,我希望重新團結香港人。

 

而家,我需要你哋支持我嘅競選籌款計劃。你所付出嘅每一分每一亳,唔係支持緊曾俊華一個人,而係支持緊一份團結香港嘅精神。

 

同一天空下,互相信任,燃點希望,香港人要團結拍住上!

 

%d bloggers like this: